Alban məbədi Gəncənin Mirzə Abbas Abbaszadə küçəsində yerləşir.
Məbədin tarixi ilə bağlı müxtəlif fikirlər mövcuddur. Bəzi mənbələrə görə, məbədin inşa tarixi V-VII əsrlərə aiddir və XVII əsrdə bərpa olunduğu göstərilir. Digər mənbələrə görə, Alban məbədi Gəncədə XVIII əsrdə inşa edilib.
Bu məbəd sonralar “Müqəddəs İohann Kilsəsi” kimi tanınıb. Burada Gəncədə yaşayan xristianlar ibadət ediblər.
Alban məbədi yeddi sütunludur. İnanclara görə, bu, dünyanın yeddi möcüzəsinə işarədir. Bina qırmızı tuf daşından inşa olunub. Kilsənin günbəzi yonulmuş daşdan hazırlanıb. Məbəd bir neçə otaqdan ibarətdir.
1860-cı ildə Zubaryan soyadlı erməni ustası məbədin qarşısında giriş binası tikir, dəhliz və bir neçə otaq əlavə edir. Abidənin çardağının üstündə ermənilərə məxsus kilsə-zəng qülləsi qoyulur və məbədin köhnə hissəsinə erməni xaç nişanələri oyulur. Ermənilər bu ibadət evini öz kilsələri kimi qələmə vermək üçün onun qapısının üzərindəki yazıları və digər detalları silirlər. Lakin bu abidə memarlıq üslubuna görə alban məbədləri tipinə aiddir.
1970-ci illərdə kilsənin keşişi şəfalı talismanların tərtibçisi və fotoşəkillərdən şəfa verən kimi tanınırdı.
Alban kilsəsinin binasında bir müddət Gəncə Dövlət Kamera Orkestri fəaliyyət göstərib. Hazırda isə məbəd yararsız vəziyyətə düşüb və istifadə olunmur.
Gəncədə hal-hazırda iki Alban məbədi mövcuddur.
