Gəncədə çalışan keçmiş DİN əməkdaşı intihar edib. Bu haqda 20 iyul tarixində Qafqazinfo-ya istinadən məlumat veririk.
Ötən gün axşam 32 yaşlı Turalə Aslanova Mingəçevir Şəhər Prokurorluğunda özünə qəsd edib. Mərhum bir müddət Baş Pasport Qeydiyyat və Miqrasiya İdarəsinin Gəncə Şəhər Şöbəsində işləyib. Daha sonra Aslanovanın dələduzluq əməlləri ilə bağlı şikayətlər daxil olub və o, tutduğu vəzifədən və polis sıralarından uzaqlaşdırılıb.
Məlum olub ki, Turalə bir neçə şəxsdən iş qurmaq və əlavə pul qazanmaq vədi ilə ümumilikdə 413 min manat pul alıb. Aslanovanın vəkili Emin Kiçikbəyov bu işdə özünün də zərərçəkmiş olduğunu bildirib:
“İki aya yaxın idi ki, onunla müqavilə bağlamışdım. Pulları kimlərdənsə alıb, kimlərəsə vermişdi. Əsasən, Kəmalə adlı qadının adı qeyd edilirdi və istəyirdi ki, ona cinayət işi açılsın. Bildiyim qədər onlar birlikdə polisdə işləyiblər. Baş Prokurorluğun tapşırığına əsasən, bu iş Mingəçevirdə ciddi araşdırılmalı idi və bizi ora dəvət etdilər. Orada onun köhnə vəkili də var idi. Hər şey qaydasında gedirdi. Turalə özü də Kəmalə adlı şəxsdən şikayətçi idi. Nə qədər çalışdım ki, zərərçəkənləri razılaşdırım, alınmadı”.
Vəkilin sözlərinə görə, Turalə əvvəlki iş yerinə aparılacaqdı və orada tutulacaqdı.
“Ora getmək istəmirdi, özünə ar bilirdi. Hər şey 1-2 saniyə ərzində oldu. Həmin vaxt pəncərənin qarşısında dayanıb ağlayırdı, mən də otağa yenicə daxil olmuşdum, divana əyləşmək istəyirdim ki, gördüm pəncərəni açıb özünü atdı. Təəssüf ki müdaxilə etsək də, həyatını xilas etmək mümkün olmadı”, - deyə Kiçikbəyov qeyd edib.
