Samuxda yol qəzasında iki polis əməkdaşının ölümündə günahlandırılan Allahverdi Behbudovun barəsindəki qərardan dövlət ittihamçısı tərəfindən verilən kassasiya protesti üzrə məhkəmə iclasının bəzi detalları məlum olub.
Pravda.аz xəbər verir ki, Ali Məhkəmənin hakimi Ələsgər Novruzovun sədrliyi ilə keçirilən prosesdə elan edilib ki, prokuror protestində Gəncə Apellyasiya Məhkəməsinin 20 fevral 2024-cü il tarixli qərarının ləğv olunmasını və işin yeni apellyasiya baxışının təyin edilməsini istəyib.
“Belə ki, iş üzrə hər iki zərərçəkmis şəxsin hüquqi varisləri ibtidai istintaqın əvvəlindən hökm çıxarılan günədək təqsirləndirilən şəxsdən şikayətçi olublar. Bununla yanaşı təqsirləndirilən şəxs baş vermiş hadisədə təqsirinin olmadığını bildirib. Bu amillər məhkəmə tərəfindən cəza təyini zamanı nəzərə alınmayıb. İstər birinci instansiya məhkəməsində, istərsə də apellyasiya icraatında da zərərçəkmiş Ləman Süleymanzadənin atası olan hüquqi varisi Nazim Süleymanov Allahverdi Behbudova ağır cəza təyin olunmaqla, onun cəzalandırılmasını tələb edib. Həmçinin iş üzrə digər hüquqi varis cəzaya münasibət bildirərkən aralarında hər hansı razılığın olmaması, təqsirləndirilən şəxsə ağır cəza təyin edilməsini məhkəmədən tələb edib. Belə olduğu təqdirdə təqsirləndirilən şəxsə maddənin sanksiyasında minimum olan, cəzaçəkmə müəssisəsinin növünə təsir edən 5 il müddətə azadlıqdan məhrumetmə cəzası təyin edilməsi açıq-aşkar təqsirləndirilən şəxsin şəxsiyyətinə, törətdiyi əmələ, həmçinin əmələ olan münasibətinə uyğun olmayıb. Allahverdi Behbudovun zərərçəkmiş şəxsin hüquqi varislərdən biri ilə barışması onun barəsində Cinayət Məcəlləsinin 60-cı maddəsinin tətbiq edilməsini tələb etmir. Hətta hər iki zərərçəkmiş şəxsin hüquqi varisi ilə barışıq əldə edilməsi belə təqsirləndirilən şəxsə maddənin sanksiyasının ən aşağı həddində cəza təyin edilməsini mütləq şərtləndirmir. Göründüyü kimi həmin normanın tətbiqi məhkəməyə yalnız əsas cəza kimi 7 il 6 ay müddətə azadlıqdan məhrumetmə cəzasından daha ağır cəza təyin etməsini qadağan edir. Beləliklə, məhkəmə məhkuma onun törətdiyi cinayətin ağırlığına uyğun olmayan yüngül cəza təyin edib. Odur ki, göstərilənləri nəzərə alaraq Allahverdi Behbudovun barəsində Gəncə Apellyasiya Məhkəməsinin Cinayət Kollegiyasının 20 fevral 2024-cü il tarixli qərarını ləğv etməklə, cinayət işinin yeni apellyasiya baxışına təyin edilməsi barədə qərar qəbul edilməsini xahiş edirəm”, - dövlət ittihamçısı bildirib.
Qərara əsasən, kassasiya protesti təmin edilməyib.
Qeyd edək ki, Gəncə Ağır Cinayətlər Məhkəməsinin hökmü ilə o, 5 il müddətinə azadlıqdan məhrum edilib. Hökmdən narazı qalan hökmdən dövlət ittihamçısı apellyasiya protesti və təqsirləndirilən apellyasiya şikayəti verib. Gəncə Apellyasiya Məhkəməsi protest və şikayəti təmin etməyib. Ali Məhkəmədə də protest və şikayəti təmin etməyib.
İttihama görə, hadisə 16 avqust 2020-ci il tarixində Samux rayonu ərazisində qeydə alınıb.
Hadisədə iştirak edən “NEW Holland TC-5050” markalı kombaynın sürücüsü, 1972-ci il təvəllüdlü Allahverdi Behbudov Cinayət Məcəlləsinin 263.3-cü (Yol hərəkəti və ya nəqliyyat vasitələrinin istismarı qaydalarını pozma – 2 və daha çox şəxsin ölümünə səbəb olduqda) maddəsi ilə təqsirli bilinib.
Bildirilib ki, hadisə vaxtı kombaynla 1998-ci il təvəllüdlü polis zabiti Elnur Çağırqanovun sürdüyü “Mercedes” markalı minik avtomobilinin toqquşması E.Çağırqanovun və sərnişini olan polis serjantı, 1996-cı il təvəllüdlü Süleymanzadə Ləman Nazim qızının həyatını itirməsinə səbəb olub.
