Milli Məclisdə prezidentin andiçmə mərasimi keçirilib. Bu haqda 14 fevral tarixində Report-a istinadən məlumat veririk.
Ümumxalq səsverməsi ilə Azərbaycan Respublikasının Prezidenti seçilmiş İlham Əliyevin andiçmə mərasimi açıq elan olunub. Silahlı Qüvvələrin əsgərləri Dövlət Bayrağını və Azərbaycan Respublikası Prezidentinin ştandartını (bayrağını) marşın sədaları altında səhnəyə gətiriblər.
Azərbaycan Respublikası Konstitusiya Məhkəməsinin sədri Fərhad Abdullayev İlham Əliyevi Konstitusiya Məhkəməsi hakimlərinin iştirakı ilə andiçməyə dəvət edib. Prezident əlini Azərbaycan Respublikası Konstitusiyasının üzərinə qoyaraq and içib:
“Azərbaycan Respublikası Prezidentinin səlahiyyətlərini həyata keçirərkən Azərbaycan Respublikasının Konstitusiyasına əməl edəcəyimə, dövlətin müstəqilliyini və ərazi bütövlüyünü qoruyacağıma, xalqa ləyaqətlə xidmət edəcəyimə and içirəm!”
Daha sonra Əliyev müqəddəs “Qurani-Şərif”ə əl basaraq and içib:
“Əlimi “Qurani-Şərif”ə basaraq and içirəm: Azərbaycan xalqının əsrlər boyu yaratdığı milli mənəvi dəyərlərə və ənənələrə sadiq olacağam, onları daim uca tutacağam.”
Dövlət Himni səsləndirilib, İlham Əliyev təzim edərək, Dövlət Bayrağını öpüb.
Xatırladaq ki, 7 fevral tarixində keçirilən növbədənkənar prezident seçkilərinin yekun nəticələrinə əsasən, İlham Əliyev 92,12 faiz səslə növbəti dəfə prezident seçilib.
