Bu gün Azərbaycan Respublikasının Elm üzrə Prezident mükafatçısı, Prezident təqaüdçüsü, İsveç Kral Akademiyasının üzvü, dünyanın nüfuzlu elmi nəşrlərində əsərlərinə ən çox istinad edilən gənc azərbaycanlı alim Elnur Həsənovun doğum günüdür.
Gencexeber.az məlumat verir ki, Yaponiya Elm cəmiyyətinin və Frankfurt – Höte (Almaniya) Universitetinin fəxri üzvü, İsveç Kral Akademiyası Rəyasət Heyətinin 14/3-12/2016 tarixli qərarı ilə namizədliyi Nobel mükafatı Komitəsinə irəli sürülmüş Elnur Həsənov Gəncə şəhərində ziyalı ailəsində anadan olub.
Gəncə Dövlət Universitetinin məzunu olan gənc alim ölkəmizlə yanaşı Almaniya, Avstriya, ABŞ, Türkiyə, Kanada, Misir, Çexiya, İraq, Braziliya, Böyük Britaniya, Pakistan və bütövlükdə dünyanın 80-dən artıq ölkəsinin yüksək impakt faktorlu akademik nəşrlərində 400-dən artıq elmi əsər və monoqrafiya (kitab) çap etdirib. E.Həsənovun müəllifi olduğu elmi kitab və məqalələr “Web of Science”, “Scopus”, “Google Scholar” və digər tanınmış beynəlxalq elmi bazaların nəşrlərində dərc olunub.
Gənc tədqiqatçımızın əsərlərinə dünya alimləri tərəfindən 1290 dəfə istinad edilib. Bu, Azərbaycanda 40 yaşa qədər gənc alimlər arasında ictimai-humanitar elmlər üzrə ən yüksək nəticədir. Mötəbər elmi göstəricilərinə görə E.Həsənov ötən il “İstinadda rekord” diplomu ilə təltif edilib.
Elnur Həsənov həm də İtaliyanın Elm nəşriyyatının fəxri üzvüdür və dəfələrlə ölkəmizlə yanaşı, bir çox beynəlxalq elmi qurumların yüksək Dövlət təltifləri ilə mükafatlandırılıb.
