Gəncə şəhər Nizami Gəncəvi Muzeyində “Nizami Gəncəvi Muzeyi, yeni məkanda – 10 il” adlı tədbir keçirilib.
Gencexeber.az məlumat verir ki, Gəncə şəhər Nizami Gəncəvi Muzeyinin təşkilatçılığı ilə muzeyin fəaliyyətinin 10 illiyinə həsr olunan “Nizami Gəncəvi Muzeyi, yeni məkanda – 10 il” adlı tədbir təşkil olunub. Tədbirdə müəssisə rəhbərləri, ziyalılar, şəhər ictimaiyyəti və məktəblilər iştirak ediblər.
Toplantıda muzeyin fəaliyyəti və burada qorunan eksponatlar barədə məlumat verilib. Gəncə şəhər 39 nömrəli tam orta məktəbin şagirdləri Nizami Gəncəvinin qəzəllərini səsləndiriblər. Bundan əlavə, Gəncə şəhər Bülbül adına 3 nömrəli Uşaq Musiqi Məktəbinin müəllim və şagirdləri tərəfindən Nizami Gəncəvinin yaradıcılığına həsr olunmuş musiqi nömrələri ifa edilib.
Sonda iştirakçılar muzeyin ekspozisiyası ilə tanış olub, Nizami Gəncəvinin həyatı və yaradıcılığı barədə ətraflı məlumat əldə ediblər.
