Gəncədə futbol akademiyasına baş çəkilib. Bu haqda 19 iyul tarixində “Kəpəz” PFK-ya istinadən məlumat veririk.
İcra başçısı Niyazi Bayramov Gəncə Futbol Akademiyası ilə tanış olub. “Kəpəz”in İdarə Heyətinin sədri İlqar Nadiri AFFA-nın dəstəyi ilə inşa edilən akademiya ilə bağlı şəhər rəhbərliyinə məlumat verib. Bildirilib ki, inşaat işləri bir müddət öncə yekunlaşıb. Son mərhələdə binanın mebel təchizatı, fitnes avadanlıqları və digər inventarların yerləşdirilməsi prosesi yerinə yetiriləcək. Akademiyada bəzi otaqlar simvolik olaraq, “Kəpəz”in rənglərinə uyğun - sarı və göy rənglərlə rənglənib.
Niyazi Bayramov stadionun əsas meydanına baxış keçirib. Burada yaz aylarında yararsız hala düşən qazon yenilənib və oyunları qəbul etməyə tam hazırdır. İcra başçısı Təlim-Məşq Mərkəzinin meydanları ilə də tanış olub. Millət vəkili Müşfiq Cəfərov məlumat verib ki, futbol infrastrukturunun inkişafı məqsədilə burada standart ölçülərə malik bir süni və iki təbii meydan salınıb. Son iki meydança may ayında istifadəyə verilib və komandalar artıq burada məşq edir.
Şəhər rəhbərliyi yeni futbol ilində kluba uğurlar arzulayıb.
