Məktəb, lisey və kollec müəllimləri, eləcə də inzibati işçilərdən ibarət komandalar üçün “Nə? Harada? Nə zaman?” oyunu üzrə respublika çempionatı keçirilib.
Gencexeber.az bildirir ki, iki mərhələdən ibarət çempionatın ilkin seçim turu onlayn formatda baş tutub.
Final mərhələsində Bakı, Gəncə, Goranboy, Quba, Cəbrayıl, Samux, Şəmkir, Hacıqabul, Zəngilan, Ağdam, Sumqayıt, Kəlbəcər, Gədəbəy, Xaçmaz, Biləsuvar, Saatlı, Xocavənd və Zərdab müəllimləri və inzibati işçilərindən ibarət 32 komanda yarışıb.
4 turdan ibarət olan final mərhələsində iştirakçılara ümumilikdə 40 sual təqdim edilib. İlk 20 sualda topladıqları bala əsasən komandalar böyük və kiçik kubok uğrunda mübarizə aparıb. Böyük kubok oyununun nəticələrinə əsasən, Goranboy rayonunun "The Masters" komandası I yerə layiq görülüb.
Kiçik kubok uğrunda mübarizədə isə Gəncə şəhərinin "Kayzen" komandası I yerə layiq görülüb.
