Xəbər verdiyimiz kimi, Gəncənin "Kərpic zavodu" kimi tanınan qəsəbə sakinlərinin iddiasına görə, aidiyyəti qurum tərəfindən zibil konteynerləri gec-gec təmizlənir. Bu səbəbdən həmin yer çirklənib.
Gencexeber.az-a Gəncə şəhər Mənzil Kommunal Təsərrüfatı İstehsalat Birliyindən (MKTİB) verilən məlumata əsasən, sözügedən iddia həqiqəti əks etdirmir. Orada məişət tullantılarının atılması üçün konteynerlər olsa da, nədənsə adıçəkilən qəsəbənin sakinləri məişət tullantılarını məhz konteynerlərin ətrafına atmağa üstünlük veriblər.
Əlavə edilib ki, aparılan monitorinqlər zamanı adıçəkilən qəsəbənin sakinlərinin bir çoxunun Gəncə şəhər MKTİB məişət tullantılarının daşınması üçün nəzərdə tutulan ödənişlərdən boyun qaçırdığı da məlum olub.
Bildirilib ki, qurumun müvafiq şöbələri tərəfindən ərazi tam təmizlənib.
Gəncə şəhər MKTİB əhaliyə müraciət edərək xatırladıb ki, məişət tullantılarını bunun üçün nəzərdə tutulmuş konteynerlərə atılmalıdır, əks təqdirdə ətrafı zibilləyən vətəndaşlar haqqında inzibati qaydada tədbirlər görüləcək.
