Bu gün Azərbaycanın Milli Qəhrəmanı İsgəndər Söhrab oğlu Aznaurovun vəfatının 32-ci ildönümüdür.
Gencexeber.az xatırladır ki, xalq arasında "Topçu İsgəndər" kimi tanınan Milli Qəhrəman 1956-cı il avqustun 16-da Özbəkistanın Buxara vilayətinin Qala-Asiya kəndində Axısqa türkü ailəsində dünyaya gəlib.
Topçu İsgəndər 1992-ci ilin aprelində könüllü olaraq yeni yaranmaqda olan Azərbaycan Silahlı Qüvvələrinin sıralarına qoşulub, Gədəbəyin Şınıx bölgəsində yerləşən və indi onun adını daşıyan qaladan bir gündə düşmənin 4 topunu sıradan çıxarıb, onlarla erməni işğalçısını məhv edib, həmçinin düşmən mövqelərinə ciddi zərbələr vuraraq bir neçə silah-sursat anbarını dağıdıb.
1993-cü ilin yaz aylarında hücuma başlamazdan əvvəl Aznaurov top atəşi ilə düşmən postunu məhv edib və düşmən onun başı üçün pul mükafatı müəyyənləşdirib.
1993-cü il aprelin 18-də isə Gədəbəydə “Örükdaş”da düşmənin 13 texnikasına qarşı 3 növ texnika ilə vuruşub. Səhhətində problemlər yaranmasına baxmayaraq, müalicə almaqdan imtina edən Milli Qəhrəman arxa cəbhədəki mövqeyini tərk edərək, minalanmış geniş ərazini keçərək ön cəbhəyə - döyüşlərin ən qızğın hissəsinə yollanıb.
Orada gedən atışmalar zamanı Aznaurovun topu düşmən hədəfinə tuş gəlib və o, qəhrəmancasına şəhid olub. Qəhrəman Bakının Şəhidlər Xiyabanında dəfn edilib.
