Gəncə Şəhər Baş Polis İdarəsinin Dövlət Yol Polisi Şöbəsinin əməkdaşlarının təşkilatçılığı ilə şəhərin 10 saylı tam orta məktəbində yol hərəkətinin təhlükəsizliyinə həsr olunmuş maarifləndirici görüş keçirilib.
Gencexeber.az bildirir ki, görüşün keçirilməsində əsas məqsəd məktəblilər arasında yol hərəkəti qaydalarına dair biliklərin artırılması, onların təhlükəsiz davranış vərdişlərinin formalaşdırılması olub.
Əsasən aşağı sinif şagirdlərinin iştirakı ilə təşkil olunan tədbirdə məktəblilərə yol hərəkətinin təhlükəsizliyini təmin edən əsas yol nişanları əyani şəkildə nümayiş etdirilib, həmin nişanların mənaları və tətbiq qaydaları barədə ətraflı məlumat verilib. Şagirdlərin mövzuya marağını artırmaq məqsədilə interaktiv sual-cavab formatından istifadə olunub, onların sualları cavablandırılıb.
Görüşdə çıxış edən polis əməkdaşları uşaqlara piyadaların yol hərəkətində davranış qaydaları, yolun müəyyən edilmiş yerlərdən keçilməsinin vacibliyi, işıqfor siqnallarına düzgün əməl olunması, eləcə də təhlükəsizlik kəmərlərinin əhəmiyyəti barədə izahlar veriblər. Həmçinin valideynlərin də bu məsələdə məsuliyyətli olmasının önəmi vurğulanıb.
Sonda məktəblilərə gündəlik həyatlarında yol hərəkəti qaydalarına daim riayət etmələri tövsiyə olunub və belə maarifləndirici tədbirlərin davamlı keçirilməsinin vacibliyi qeyd edilib.
