Gəncədə birincilik üzrə yarış start götürüb. Bu haqda 6 iyun tarixində Dövlət Gömrük Komitəsinə istinadən məlumat veririk.
Müstəqil Dövlətlər Birliyi (MDB) İştirakçı Dövlətlərinin Gömrük Xidmətlərinin kinoloji bölmələrinin çoxnövçülükdə birincilik üzrə XI yarışı başlayıb. Burada Azərbaycanla yanaşı, Qazaxıstan, Qırğızıstan, Rusiya və Özbəkistan gömrük xidmətlərinin kinoloji bölmələri də iştirak edirlər.
Açılış mərasimində Dövlət Gömrük Komitəsinin sədri gömrük xidməti general-leytenantı Şahin Bağırov müsabiqəni gömrük orqanları kinoloqları üçün əlamətdar hadisə adlandırıb və bu kimi yarışların partlayıcı, narkotik vasitə, silah, qadağan olunan malların gömrük sərhədindən qanunsuz keçirilməsinin qarşısının alınması və qaçaqmalçılıqla mübarizədə önəmindən bəhs edib. Tədbirdə Qazaxıstan, Qırğızıstan, Özbəkistan gömrük xidmətlərinin rəhbərləri də danışıblar. Onlar yarışın qarşılıqlı təcrübə mübadiləsi, bacarıqların daha da inkişaf etdirilməsi baxımından əhəmiyyətini vurğulayıb, dostluğun qazanacağına əminliklərini ifadə ediblər.
Yarış 5 axtarış mərhələsindən - narkotik vasitələrin əl yüklərində, minik avtomobillərində, yük avtomobillərində, ümumi otaq şəraitində axtarışı və ümumi itaətetmə mərhələsindən ibarətdir. Birincilik 8 iyun tarixinədək davam edəcək. Burada, həmçinin kinoloji məsələlər üzrə İşçi Qrupunun 27-ci iclası və “Hava limanının keçid məntəqələrində xidməti itlərdən istifadənin xüsusiyyətləri” mövzusunda seminar da keçiriləcək.
