Gəncə sakini polis tərəfindən saxlanılıb. Bu haqda Gencexeber.az-a 6 iyun tarixində məlumat daxil olub.
TikTok-da polisə qarşı nalayiq ifadələr səsləndirən şəxs müəyyən edilib. DİN-in Mətbuat Xidmətinin bölgə üzrə baş inspektoru, polis kapitanı Eşqin Qasımov bildirib ki, əvvəllər məhkum olunmuş şəhər sakini Anar Süleymanov polis şöbəsinə dəvət edilib. Buna səbəb onun TikTok platformasında Daşkəsən rayon Polis Şöbəsinin əməkdaşlarının ünvanına əsassız və qərəzli formada iddialar səsləndirməsi və onlar barəsində nalayiq ifadələr işlətməsi olub.
Lakin o, səs-küy qaldıraraq nizamsız hərəkətlərini davam etdirib, polis əməkdaşlarının qanuni tələblərinə qəsdən tabesizlik göstərib. Bu hərəkətlərinə görə onu rayon polis şöbəsinə gətiriblər. Süleymanov barəsində protokollar tərtib edilib. Məhkəmənin qərarı ilə o, 30 gün inzibati qaydada həbs olunub.
Qeyd edək ki, Süleymanov Daşkəsən rayonu ərazisində ayrı-ayrı vətəndaşlara məxsus örüş sahələrini zəbt edərək, qanunsuz olaraq digər şəxslərə icarəyə verib. Onun bu cəhdinin qarşısını polis əməkdaşları aldığına görə Anar polis haqqında həqiqətə uyğun olmayan iddialar səsləndirib.
