Gəncə "İmamzadə" ziyarətgah kompleksində xoşagəlməz vəziyyətin yaşandığı iddia olunur.
Gencexeber.az-a daxil olan şikayətlərə əsasən, kompleksdə ibadət üçün ayrılmış hissədə qeyri-sabit hava şəraiti zamanı yağış suları tikilinin tavanından içəri axır.
Görüntülərdən günbəzin səthində saralma, boya qatının qopması və zədələnmələr olduğu aydın sezilir. Vətəndaşların sözlərinə görə, ibadət zamanı su damcıları onların üzərinə tökülür, məkan daxilində nəmişlik yaranır və qeyri-komfort şərait formalaşır.
Xalçaların islanmaması üçün isə su daman yerlərə vedrələr düzülüb.
Qeyd edək ki, bu, Qərb bölgəsinin ən böyük dini komplekslərindən biri hesab olunan "İmamzadə" ziyarətgahı ilə bağlı ilk şikayət deyil. Bundan əvvəl də vətəndaşlar kompleksdəki sanitar qovşağın vəziyyətindən narazılıq ediblər. İddialara görə, həmin ərazidə su təchizatı ilə bağlı problemlər yaşanıb, ziyarətçilər isə üfunətdən şikayətləniblər.
