“İki həftə bundan öncə sənədləri topladıq və ailə üzvləri olaraq ərizə yazdıq. Həmçinin Təbrizdəki konsulumuza bizim adımızdan edamda iştirak etmək üçün etibarnamə verdik”.
Bunu musavat.cоm-a açıqlamasında Tehrandakı səfirliyimizə silahlı hücumda şəhid olan Orxan Əsgərovun atası Rizvan Əsgərov deyib. O bildirib ki, sənədlər İrana göndərilsə də hələ də edamla bağlı xəbər yoxdur.
“Ərizədə qeyd etdim ki, edam prosesində mən özüm iştirak etmək istəyirəm. Lakin İran tərəfi çalışır ki, vaxtı uzatsın. Buna görə də hansısa yeni məlumat əldə edə bilmirik. İranın Ali Məhkəməsi rəsmi edam qərarını çıxarıb, niyə onu icra etmək istəmirlər, anlamıram. Biz də hansısa məlumat ala bilmirik. İran tərəfi deyir ki, hadisə ailə-məişət zəmnində olub. Boş söhbətdir. İşin gedişi göstərir ki, bu terrordur”.
Qeyd edək ki, 2023-cü ilin 27 yanvar tarixində Azərbaycanın İrandakı səfirliyinə hücum edən İran vətəndaşı Yasin Hüseynzadə “Kalaşnikov” markalı avtomat silahla mühafizə xidmətinin rəisi Orxan Əsgərovu qətlə yetirib. Səfirliyin mühafizə xidmətinin iki əməkdaşı - Vasif Tağıyev və Mahir İmanov hücumun qarşısını alarkən yaralanıblar.
