Gəncədə qəbul imtahanlarının vaxtı açıqlanıb. Bu haqda 6 iyul tarixində DİM-ə istinadən məlumat veririk.
Dövlət İmtahan Mərkəzinin məlumatına əsasən, abituriyentlər Nizami yurdunda 8 iyul III, 9 iyul isə II ixtisas qrupu üzrə ali təhsil müəssisələrinə qəbul imtahanı verəcəklər. İyulun 9-da III ixtisas qrupu üzrə DT və TC altqruplarının hər ikisini seçən abituriyentlər üçün coğrafiya fənni üzrə də imtahan keçiriləcək.
Abituriyentlər iyulun 3-dən etibarən Dövlət İmtahan Mərkəzinin saytında "İmtahana buraxılış vərəqəsi"ni çap edə bilirlər. Orada imtahanın keçiriləcəyi tarix, bina, zal, başlanma vaxtı və abituriyentin imtahan binasına gəlmə vaxtı və s. məlumatlar qeyd olunub. İmtahanın başlanmasına 15 dəqiqə qalmış – saat 09:45-də buraxılış rejimi başa çatır və bundan sonra gələn iştirakçılar imtahan binasına buraxılmırlar.
Məzunlar imtahana buraxılış vərəqəsi və şəxsiyyəti təsdiq edən sənədin əsli ilə gəlməlidirlər.
