Gəncədən olan idmançılar turnirdə yüksək nəticə göstəriblər. Bu haqda 28 may tarixində Azərbaycan Cüdo Federasiyasına istinadən xəbər veririk.
Kişilər arasında Azərbaycan Cüdo Federasiyası turunun ikinci turniri keçirilib. Hövsan qəsəbəsində yerləşən Fövqəladə Hallar Nazirliyinin İdman Sağlamlıq Mərkəzində olan yarışda yetirmələrimiz Tofiq Əliyev və Elcan Abbasov qalib olublar. Onlar 66 və 81 kiloqram çəki dərəcələrində mübarizə aparıblar.
Yarışın məqsədi kişi cüdoçular arasında rəqabət səviyyəsinin, onların ustalığının yüksəldilməsi və təcrübələrinin artırılmasına nail olmaqdır. Eyni zamanda istedadlı idmançıların aşkarlanması və milli yığma komandaya cəlb olunmasıdır.
Qeyd edək ki, bu il üç belə turnirin keçirilməsi planlaşdırılır və bu yarışlar nəticəsində formalaşacaq reytinq siyahısında ilk yeri tutan idmançılar beynəlxalq turnirlərdə iştirak hüququ qazanacaqlar.
