Gəncədə İdman Sarayında baş verən hadisə ilə bağlı açıqlama verilib. Bu haqda 26 fevral tarixində Apa-ya istinadən məlumat veririk.
Bir neçə gün öncə yeni tikilən İdman Sarayında tüstüləmənin olması barədə xəbər paylaşmışdıq. Hadisə ilə bağlı “Rövşən Oğuz” Şirkətinin Baş direktorunun müavini Elvin Kərəmli açıqlama verib.
Bildirilib ki, tikinti işləri yerinə yetirilərkən deşici alətdən yaranmış qığılcım səbəbindən fasadda nəmə qarşı quraşdırılmış 0,5 kvadratmetr membran tüstülənib. Həmin an şirkət əməkdaşları tərəfindən müdaxilə edilib və binada quraşdırılmış yanğın balonları vasitəsilə tüstüləmənin yanğına keçməsinin qarşısı alınıb, yanğın fəsadsız ötüşüb.
“Qısa zamanda Yanğından Mühafizə Xidmətinin texnikası və əməkdaşları hadisə yerinə gəlib. Ancaq onların heç bir müdaxiləsinə ehtiyac qalmayıb. Xidmət işçiləri yerində texniki baxış həyata keçirərək yoxlamalar aparıb, heç bir yanğın təhlükəsi olmadığını qeyd edərək geri dönüblər. Tüstünün qarşısı alınarkən yanğınsöndürmə balonlarındakı qazın təsirindən 3 nəfər zəhərlənib. Onlar 3 nömrəli Şəhər Xəstəxanasında ilkin tibbi yardım göstərildikdən sonra evə buraxılıblar. 1 nəfərin isə həyəcandan qan təzyiqi yüksəlib. Həmin şəxsə də tibbi yardım göstərilib və evə buraxılıb. Tüstüləmə zamanı tikintiyə heç bir maddi ziyan dəyməyib”, - deyə Kərəmli qeyd edib.
