Bu gün şəhid Elşən İbrahimovun doğum günüdür.
Elşən Həsən oğlu İbrahimov 11 yanvar 1962-ci ildə Gəncə şəhərində anadan olub. 23 saylı orta məktəbin 8-ci sinfini bitirdikdən sonra, 1976-cı ildə 15 nömrəli peşə məktəbinə daxil olub və qaynaqçı peşəsinə yiyələnib.
1980-ci ildən 1982-ci ilədək Xabarovsk vilayətində hərbi xidmət keçib. 1982-ci ildən 1986-cı ilədək tikinti idarəsində qaynaqçı vəzifəsində işləyib, 1987-ci ildən 1991-ci ilədək isə Rusiya Federasiyasında olub.
I Qarabağ müharibəsi zamanı Elşən İbrahimov 1992-ci ildə Rusiya Federasiyasından gəlib və könüllü olaraq cəbhəyə yollanıb. O, Ağdərə, Ağdam, Çıldıran, Vəng kəndləri uğrunda gedən döyüşlərdə iştirak edib.
Elşən İbrahimov 15 oktyabr 1992-ci ildə Sırxavənddə döyüş əməliyyatını yerinə yetirən zaman minaya düşüb və ağır yaralanıb. Ağdərə hospitalına gətirilən həmyerlimizin vəziyyəti ağır olduğundan Bakı şəhər hospitalına yerləşdirilib və 7 gündən sonra, 22 oktyabr 1992-ci ildə vəfat edib. İbrahimov Elşən Həsən oğlu Gəncə şəhəri Şəhidlər xiyabanında dəfn olunub.
