Gəncəli idmançı ilə döyüşən italiyalı sərbəst güləşçinin rüşvət iddiasına cavab verilib. Bu haqda 12 aprel tarixində Report-a istinadən xəbər veririk.
Xatırladaq ki, Milli Gimnastika Arenasında güləş üzrə Avropa Olimpiya Təsnifat turniri keçirilib. Bu yarışın yarımfinalında Turan Bayramov italiyalı Frank Çamizoya qalib gələrək Paris–2024 Olimpiya oyunlarına lisenziya əldə edib. Ancaq rəqib məğlubiyyətlə barışmayaraq ağır ittiham irəli sürüb. Çamizo heç bir dəlil-sübut olmadan guya bu görüşdə məğlub olması üçün ona 300 min dollar rüşvət təklif edildiyini bildirib.
Bu görüşlə bağlı Dünya Güləş Birliyi hakim idarəçiliyini araşdırmağa başlayıb və yaxın günlərdə müvafiq qərar veriləcək.
Azərbaycan Güləş Federasiyası isə məsələ ilə bağlı deyib ki, Çamizo "Duty to report" qaydalarına əsasən, belə bir rüşvət təklifinin olması ilə əlaqədar dərhal etiraz protokolunda öz qeydlərini etməli idi. İndi ya o, öz iddiasını sübuta yetirməli, ya da bu iddianın əsassız olduğunu bildirməlidir.
Qeyd edək ki, Avropa Olimpiya Təsnifat turnirində 36 idmançı Paris–2024-ə lisenziya qazanıb. Onlardan 5-i Azərbaycan təmsilçiləridir.
