Gəncədə bir sıra qurumlar gücləndirilmiş iş rejiminə keçib. Bu haqda 25 may tarixində İcra Hakimiyyətinə istinadən məlumat veririk.
Bu gün səhər saatlarından etibarən şəhər ərazisində güclü külək müşahidə olunur. Bununla əlaqədar Şəhər İcra Hakimiyyəti başçısı yanında fəaliyyət göstərən Fövqəladə Hallar Komissiyası gücləndirilmiş iş rejimində çalışır.
İlkin məlumata görə, güclü külək nəticəsində şəhərin Heydər Əliyev və Nizami Gəncəvi prospektlərində, Ələkbər bəy Rəfibəyli, Fikrət Əmirov, Əli bəy Hüseynzadə, Süleyman Rəhimov və digər küçələrində 20-yə yaxın iri gövdəli ağac aşıb. Bir fərdi yaşayış evinə və bir avtomobilə ziyan dəyib. Bir sıra ərazilərdə ağacların budaqları sınaraq elektrik naqillərini zədələyib. Hazırda şəhərin bəzi yaşayış massivlərində elektrik enerjisinin verilişində vasilələr yaranıb. Bu səbəbdən bir sıra işıqforlar fəaliyyət göstərmir.
Həmçinin şəhərin bəzi ərazilərində qaz boruları da zədələnib, bir neçə fərdi yaşayış evinin dam örtüyü uçub.
Qeyd edək ki, Gəncə şəhər Mənzil-Kommunal Təsərrüfatı İstehsalat Birliyinin əməkdaşları, Gəncə Elektrik Şəbəkəsinin və Regional Qaz İstismar İdarəsinin briqadaları yaranmış fəsadların aradan qaldırılması istiqamətində işlər aparırlar.
Qeyd edək ki, müşahidə olunan güclü küləkli hava şəraiti davam edir.
[modula id="60160"]
