Bıçaqlanan məktəblinin son vəziyyəti açıqlanıb.
Gencexeber.az bildirir ki, Gəncə Birləşmiş Təxirəsalınmaz Tibbi Yardım Xəstəxanasının həkimi Adil İbrahimovun sözlərinə görə, məktəbliyə ilkin tibbi yardım göstərilib.
"Xəstəyə ilkin tibbi yardım göstərdik. Bir bıçaq xəsarəti idi, ancaq yarası bir qədər dərin olub. Yara tikildi, qanaxma dayandırıldı. Hazırda vəziyyət stabildir",- deyə həkim qeyd edib.
17:44
Göygöl rayonunda 9-cu sinif şagirdinin bıçaqlanaraq xəsarət alması barədə məlumat yayılıb.
Modern.az-a Gəncə-Daşkəsən Regional Təhsil İdarəsindən bildirilib ki, Göygöl rayon Mollacəlilli kənd tam orta məktəbin 9-cu sinif şagirdi həmin məktəbin digər 9-cu sinif şagirdinə məktəbdənkənar ərazidə aralarında yaranmış mübahisə zamanı xəsarət yetirib.
Xəsarət almış şagird tibb müəssisəsinə yerləşdirilib, hazırda müalicəsi davam etdirilir.
Xəsarət almış şagirdin fiziki və psixoloji durumu məktəb rəhbərliyi və idarə tərəfindən izlənilir.
Qeyd olunanlarla yanaşı, stressin idarə olunması, sağlam psixoloji mühitin bərpasını təmin etmək üçün məktəb rəhbərliyinə şagirdlər və pedaqoji heyətlə maarifləndirici söhbətlərin aparılması tapşırılıb.
Hadisə ilə bağlı hüquq-mühafizə orqanları tərəfindən araşdırma aparılır.
Qeyd edək ki, hadisəni törətməkdə şübhəli bilinən Ə. Teymurov saxlanılıb.
16:52
Göygöl sakini bıçaqlanıb.
Unikal.аz xəbər verir ki, hadisə rayonun Mollacəlilli kəndində baş verib. Kənd sakini 2009-cu il təvəllüdlü Ə.Məmmədov bıçaq xəsarəti ilə xəstəxanaya yerləşdirilib. Dərhal yeniyetməni yarası tikilib, vəziyyətinin kafi olduğu bildirilir.
Məlumata görə, Ə.Məmmədov sinif yoldaşı tərəfindən bıçaqlanıb.
Faktla bağlı araşdırma aparılır.
