Bu gün Gəncədən olan mərhum bəstəkarın anım günüdür. Bu haqda 20 fevral tarixində Gencexeber.az məlumat verir.
Söhbət görkəmli Azərbaycan bəstəkarı, SSRİ Xalq artisti, Sosialist Əməyi Qəhrəmanı Fikrət Əmirovdan gedir. Bu gün bəstəkarın anım günüdür.
Fikrət Məşədi Cəmil oğlu Əmirov 22 noyabr 1922-ci ildə Gəncədə anadan olub. O, 1942-1943-cü illərdə Gəncə Filarmoniyasının və 1947-ci ildə Müslim Maqomayev adına Azərbaycan Dövlət Filarmoniyasının bədii rəhbəri, 1956-59-cu illərdə isə Azərbaycan Dövlət Akademik Opera və Balet Teatrının direktoru vəzifələrində çalışıb. SSRİ Bəstəkarlar İttifaqının katibi seçilib. Dahi bəstəkar bir çox operaların, baletlərin, operettaların, simfonik muğamların və suitaların müəllifidir.
Səhnə musiqisi sahəsindəki fəaliyyətinə “Ürəkçalanlar” və “Gözün aydın” operettaları ilə başlayan Fikrətin ən uğurlu əsərlərindən biri simli orkestr üçün yazdığı “Nizami” simfoniyasıdır. 1948-ci ildə “Şur” və “Kürd ovşarı” simfonik muğamlarını yazıb. O, “Nəsimi” vokal xoreoqrafik poemasının, simfonik orkestr üçün “Azərbaycan qravürləri”nin, “Gülüstan-Bayatı-Şiraz” simfonik muğamının, “Min bir gecə” nağılları əsasında eyniadlı baletin müəllifidir.
1965-ci ildə bəstəkar SSRİ Xalq artisti və 1982-ci ilin mayında Sosialist Əməyi Qəhrəmanı adlarına layiq görülüb.
Fikrət Məşədi Cəmil oğlu Əmirov 20 fevral 1984-cü ildə Bakıda vəfat edib. Fəxri Xiyabanda dəfn olunub.
