Gəncəli vokal ifaçısı Bakıda səhnə alıb.
Gencexeber.az məlumat verir ki, gəncəli vokal ifaçısı Altun Süleymanov Azərbaycanın Xalq artisti Fidan Hacıyevanın II Beynəlxalq Opera Festivalında Fikrət Əmirovun "Gülərəm gülsən" romansını ifa edib.
Mədəniyyət Nazirliyinin təşkilatçılığı, Azərbaycan Dövlət Akademik Opera və Balet Teatrı və Xəzər Universitetinin birgə əməkdaşlığı ilə Fidan Hacıyevanın II Beynəlxalq Opera Festivalı çərçivəsində 28 aprel 2025-ci il tarixində Bakı şəhərində Xəzər Universitetinin Fikrət Əmirov adına Konsert Zalında mötəbər konsert proqramı keçirilib.
Tədbirdə Azərbaycan Milli Konservatoriyasının III kurs tələbəsi, respublika və beynəlxalq müsabiqələr laureatı Altun Süleymanov, Xəzər Universitetinin Kamera Orkestrinin müşayiəti ilə Azərbaycanın görkəmli bəstəkarı Fikrət Əmirovun "Gülərəm gülsən" əsərini böyük ustalıqla ifa edib. Onun yüksək peşəkarlıq və bədii təfəkkürlə təqdim etdiyi ifa tamaşaçıların və musiqi ictimaiyyətinin dərin rəğbətini qazanıb.
Konsertdə orkestrin bədii rəhbəri, Azərbaycanın Əməkdar artisti Zülfiyyə Sadıqova və dirijor Meri Çeminava da çıxış ediblər.
Altun Süleymanovun bu uğurlu çıxışı Azərbaycan vokal məktəbinin yeni nəslinin inkişaf potensialını nümayiş etdirib və festivalın bədii səviyyəsinə mühüm töhfə verib.
