Gəncədə bir zamanlar fəaliyyət göstərən tanınmış kinoteatrların əksəriyyəti müstəqillik dövründən etibarən baxımsız vəziyyətə düşərək artıq ya sıradan çıxıb, ya da təyinatı dəyişdirilib.
Gencexeber.az məlumat verir ki, hazırda "Vətən" və "Engels" kinoteatrının yerində restoran fəaliyyət göstərir. "Bakı" kinoteatrı sökülərək ərazidə Fikrət Əmirov adına Gəncə Dövlət Filarmoniyası tikilib.
Şəhərdə binaları qalan "Nizami" və "Xronika" kinoteatrları isə faktiki olaraq yararsız vəziyyətdədir. "Nizami" kinoteatrının yalnız xarici görünüşündə müəyyən təmir işləri aparılsa da, daxili hissəsi istifadəyə uyğun deyil. Hər iki kinoteatrda kino nümayişi həyata keçirilmir və müasir avadanlıqlar mövcud deyil.
