Gəncədə sakinlərin sıx yaşadığı ərazidə quraşdırılan retranslyasiya qurğusu narazılığa səbəb olub.
Gencexeber.az məlumat verir ki, Gəncənin Məhəmməd Füzuli küçəsinin sakinləri daimi hal alan baş ağrılarından şikayət edirlər. Onların iddiasına görə, buna səbəb ərazidə telekommunikasiya şirkətlərinin birinə məxsus retranslyatorun quraşdırılması olub. Bildirilir ki, buna görə artıq 3 ildir əziyyət çəkirlər:
“Bilmirik hara şikayət edək. Baş ağrısı artıq adi hala çevrilib. Şüa mənfi təsir göstərir. Niyə məhz vətəndaşların sıx yaşadığı ərazidə bu cür avadanlıq yerləşdirilib?”
İddialarda səsləndirilən fikirlərdə əlavə edilib ki, şüa qurğunun yaxınlığında olan ağaclara da təsirsiz ötüşməyib. Bəzi yaşıllıqlar quruyaraq yararsız hala düşüb.
