1900-cü ildə Gəncəçayın sol sahili boyu uzanan ərazidə çar Rusiyası imperatorunun adını daşıyan Aleksandr bağı salınıb. Bu bağ indiki Gəncə Dövlət Dram Teatrından Mürsəl ocağına kimi olan ərazini əhatə edirdi. Daha sonra isə bu bulvara "İstiqlal bağı" adı verilib.
Gencexeber.az məlumat verir ki, bağın bu cür adlandırılması Azərbaycan Xalq Cümhuriyyətinin müstəqilliyinin tanınması ilə əlaqəlidir. Birinci Dünya müharibəsinin yekunları üzrə Parisdə uzun müddət davam edən Versal Sülh Konfransında siyasi xadim Əlimərdan bəy Topçubaşovun rəhbərliyi altında AXC-nin nümayəndə heyəti iştirak edib. Onların fəaliyyəti nəticəsində 11 yanvar 1920-ci ildə Azərbaycan Cümhuriyyətinin müstəqilliyi tanındı. Bu xəbər teleqrafla Azərbaycana çatdırılan kimi Bakıda və Gəncədə bayram coşqulu yürüş və tədbirlər keçirildi. Cümhuriyyətin orqanı sayılan "Azərbaycan" qəzetinin 22 yanvar tarixli buraxılışında "Gəncədə istiqlal bayramı" adlı məqalənin sonunda belə bir yazı var idi: "Bu şərəfli gün münasibətilə... Gəncə şəhər İdarəsi Birinci Aleksandr adına olan bağı İstiqlal bağı adlandırmağa qərar verdi".
Sovet dövründə Gəncəçayın sağ sahili də xeyli yaşıllaşdırılmış və hər iki sahili əhatə edən ərazi "Sahil bağı" adlandırılıb.
Bu ərazidə Azərbaycanın tanınmış şəxsiyyətlərinin məzarları da yerləşir. Şair Abbas Səhhət 1918-ci ildə Gəncədə vəfat edərkən şəhərin Səbiskar qəbiristanlığında dəfn olunsa da, 1947-ci ildə onun nəşi bu bağın ərazisinə köçürülüb və burada büstü qoyulub. Bağdakı digər qəbir isə vaxtı ilə Gəncədə fəaliyyət göstərmiş hərbi pilotlar məktəbinin direktoru, təyyarəçilərin hazırlığı ilə məşğul olmuş polkovnik Leonid Vasilyeviç İvanovun qəbridir.
2017-ci ildə Gəncəçayın sağ sahilindəki hissə rekonstruksiyalar nəticəsində bulvar halına gətirilib, sol sahilin yaşıl ərazisi isə "Sahil bağı" adını qoruyub saxlayıb.
