Azərbaycanda deputatlar gələn həftə tətildən qayıdacaqlar.
Gencexeber.az xəbər verir ki, Milli Məclisin Daxili Nizamnaməsinə əsasən, deputatların tətil müddəti yanvarın 15-dək davam edir.
Daxili Nizamnamənin birinci maddəsinə (Azərbaycan Respublikası Milli Məclisinin fəaliyyətinin əsasları) əsasən, səlahiyyəti dövründə Milli Məclis ildə iki dəfə - iyul ayının 15-dən avqust ayının 30-dək və yanvar ayının 1-dən 15-dək tətilə buraxılır. Tətil dövründə Milli Məclisin deputatları məzuniyyətdə sayılırlar. Tətil dövründə Milli Məclisin növbədənkənar sessiyası çağırıldıqda Milli Məclisin tətili növbədənkənar sessiyanın keçirildiyi müddətə dayandırılır və Milli Məclisin deputatları həmin müddətə məzuniyyətdən geri çağırılırlar.
Konstitusiyanın 88-ci maddəsinin I hissəsinin birinci abzasına uyğun olaraq Milli Məclis hər il iki növbəti yaz və payız sessiyalarına yığılır.
Qeyd edək ki, Gəncə üzrə deputat seçilmiş şəxslər aşağıdakılardır:
– 38 saylı Gəncə birinci Seçki Dairəsi — Naqif Ələşrəf oğlu Həmzəyev (YAP);
– 39 saylı Gəncə ikinci Seçki Dairəsi — Pərvin Orxan qızı Kərimzadə (YAP);
– 40 saylı Gəncə üçüncü Seçki Dairəsi — Musa İsa oğlu Quliyev (YAP);
– 41 saylı Gəncə-Samux-Goranboy Seçki Dairəsi — Müşfiq Cəfər oğlu Cəfərov (YAP).
