Gəncənin Şah İsmayıl Xətai prospektində asfalt örtüyündə çuxurlar əmələ gəlib.
Məsələ ilə bağlı Gencexeber.az-a şikayət ünvanlayan sürücülər bildirir ki, asfalt örtüyü bir müddət əvvəl yenilənsə də, yol bərbad vəziyyətə düşüb, hərəkət zolağında çökəkliklər yaranıb.
“Yolun bu vəziyyəti nəqliyyatın hərəkətinə ciddi maneələr yaradır. Sürücülər olaraq yaranmış vəziyyətdən şikayətçiyik. Bu cür yol şəraiti qəza riskini artırır və təhlükəli vəziyyət yaradır. Gəncədə elə bir küçə yoxdur ki, orda çuxur olmasın. Aidiyyəti qurumlardan tələb edirik ki, öhdəliklərinə düşən vəzifəni yerinə yetirsinlər, Gəncə yollarını qüsursuz şəkildə asfaltlasınlar”, - deyə şikayətçilər bildirib.
