Xəbər verdiyimiz kimi, Gəncədə şəhid atası dünyasını dəyişib.
Gencexeber.az-ın məlumatına görə, şəhid Rəvan Daşdəmirovun atası Məzahir Qüdrət oğlu Daşdəmirov qəfil vəfat edib. 1957-ci il təvəllüdlü kişinin ürəktutmadan dünyasını dəyişdiyi bildirilir.
Mərhumun yas mərasimi yaşadığı Sevinc qəsəbəsində keçirilir. O, bir neçə saat öncə şəhərin qəbiristanlıqlarından birində dəfn olunub.
Qeyd edək ki, şəhid Rəvan Daşdəmirov 6 mart 1994-cü ildə Gəncə şəhərində dünyaya göz açıb. O, Vətən müharibəsi zamanı Füzuli, Zəngilan və Qubadlı rayonlarının azad olunması uğrunda vuruşub. 27 oktyabr 2020-ci ildə Füzuli rayonunda şəhidlik zirvəsinə ucalıb, iki gün sonra Gəncə şəhərinin Şəhidlər xiyabanında dəfn edilib. Qəhrəmanımız subay idi.
Rəvan Daşdəmirov ölümündən sonra Azərbaycan Respublikasının Prezidenti İlham Əliyevin Sərəncamları ilə "Vətən uğrunda", "Döyüşdə fərqlənməyə görə", "Füzulinin azad olunmasına görə" və "Vətənə xidmətə görə" medalları ilə təltif edilib.
