Gəncə şəhər ərazisində yerləşən kəsim məntəqələrində ilkin monitorinq keçirilib.
Gencexeber.az məlumat verir ki, Qurban Bayramı ilə əlaqədar, respublikanın bütün bölgələrində olduğu kimi, Gəncə şəhərində də qurbanlıq heyvanların kəsimi və satışınnın müvafiq norma və qaydalara uyğun, rahat və təhlükəsiz şəkildə həyata keçirilməsi üçün xüsusi məntəqələr yaradılıb.
Belə ki, şəhərin "Kəpəz Bazarı" ASC-də, "İmamzadə" Dini Kompleksinin qurbangahında, M.Bağırov küçəsində və keçmiş "Ət kombinatı"nın ərazisində qurbanlıq heyvanların satışı və kəsimi üçün məntəqələr təşkil olunacaq.
Gəncə Şəhər İcra Hakimiyyətinin və AQTA-nın Gəncə-Daşkəsən Regional Bölməsinin əməkdaşları tərəfindən qeyd olunan məntəqələrə ilkin baxış keçirilib.
Baxış zamanı məsul şəxslərə bildirilib ki, Qurban Bayramı günlərində vətəndaşlar və sahibkarlar qurbanlıq heyvanların kəsimini yalnız Azərbaycan Respublikasının Qida Təhlükəsizliyi Agentliyində qeydiyyatdan keçmiş məntəqələrdə həyata keçirməlidirlər. Diri heyvanların satışı isə həmin məntəqələrin yaxınlığında xüsusi ayrılmış sahələrdə təşkil olunacaq. Eyni zamanda, qurbanlıq heyvanların kəsimindən əvvəl baytar həkimlər tərəfindən müayinədən keçirilməsinin vacibliyi də diqqətə çatdırılıb.
Bununla yanaşı, məntəqələrdə gigiyena qaydalarına ciddi riayət olunması və mövcud nöqsanların aradan qaldırılması ilə bağlı müvafiq tapşırıqlar verilib.
