Gəncədə yol-nəqliyyat hadisəsi nəticəsində mağazaya ciddi ziyan vurulub.
Gencexeber.az-ın məlumatına görə, hadisə səhər saat 05:30 radələrində Əttarlar küçəsi ilə Nizami Gəncəvi prospektinin kəsişməsində qeydə alınıb.
Belə ki, "Lada Granta" markalı avtomobil yüksək sürətlə hərəkətdə olarkən idarəetmədən çıxaraq "Buta Cehizlik" mağazasına çırpılıb. Nəticədə avtomobil vitrini sındıraraq birbaşa ticarət obyektinin içinə daxil olub.
Hadisə zamanı avtomobildə olan iki nəfər – sürücü və sərnişin xəsarət almayıb.
Qəza nəticəsində mağaza sahibinə ciddi maddi ziyan dəyib. Belə ki, ticarət obyektində olan cehizlik mallarının çox hissəsi qırılaraq yararsız vəziyyətə düşüb.
Qeyd edək ki, hadisənin baş verdiyi ərazi Gəncənin ən sıx avtomobil hərəkəti müşahidə olunan yerlərindən biridir. Həmin hissədə bazar da fəaliyyət göstərir.
Hadisə yerinə polis əməkdaşları cəlb olunub, faktla bağlı araşdırma aparılır.
