Gəncədə Heydər Əliyev Park-Kompleksi ərazisində yerləşən və yenidən istifadəyə verilməsi gözlənilən süni gölün daxilində, eləcə də ətrafında antisanitar vəziyyət aradan qaldırılır.
Gencexeber.az-a Mənzil Kommunal Təsərrüfatı İstehsalat Birliyindən (MKTİB) verilən məlumata görə, daşqınlardan sonra göldə aparılan təmir-bərpa işləri tam başa çatdırılıb və gölün su ilə doldurulmasına başlanılıb.
"Amma çox təəssüf ki, son günlər adıçəkilən parka və süni gölün ətrafına istirahət məqsədilə gələn ziyarətçilər ərazini məişət və digər tullantılarla çirkələndirir. Hazırda parkın əməkdaşları tərəfindən gölün plastik butulkalardan, sellofan torbalardan və müxtəlif məişət tullantılardan təmizlənməsi həyata keçirilir.
Gəncə şəhəri Heydər Əliyev adına Park-Xiyaban kompleksi istirahət məkanına üz tutan qonaqlardan ərazidə olarkən məişət və digər tullantıları hara gəldi deyil, bunun üçün nəzərdə tutulmuş zibil qablarına atmalarını xahiş edir", – MKTİB-dən bildirilib.
Qurum əlavə olaraq qanun pozan şəxslərə səslənib:
"Məsuliyyətsiz vətəndaşların davranışı, həm parkın estetik görünüşünə xələl gətirir, həm də ətraf mühitə mənfi təsir göstərir. Halbuki Heydər Əliyev Park-Kompleksi gəncəlilərin və şəhərimizin qonaqlarının ən çox üz tutduğu istirahət məkanlarından biri hesab olunur. Demək olar ki, gün ərzində bu parkı minlərlə qonaq ziyarət edir".
Qeyd edək ki, artıq bir neçə gündür gölə yenidən suyun verilməsinə başlanılıb. Bildirilir ki, növbəti həftənin ortalarına qədər göl tamamilə dolacaq və ərazi vətəndaşların asudə vaxt keçirməsi üçün istifadəyə veriləcək.
