Gəncə şəhərində təşkil olunan əmək yarmarkası ilə bağlı narazılıqlar yaranıb.
Gencexeber.az məlumat verir ki, Dövlət Məşğulluq Agentliyi tərəfindən aprelin 7-də məlumat yayılaraq bildirilib ki, aprelin 9-u saat 11:00-dan 16:00-dək Gəncədə əmək yarmarkası keçiriləcək və vətəndaşlara ümumilikdə 10 vakansiya təqdim olunacaq.
Lakin redaksiyamıza daxil olan şikayətlərə görə, vətəndaşlar vəd olunan mənzərə ilə qarşılaşmayıblar. Tədbir "Araz" market şəbəkəsinə məxsus Atatürk prospektində yerləşən minimarketin "Mal qəbulu (anbar)" sahəsində təşkil edilib.
İddia olunur ki, iş axtaran şəxslərə mağaza daxilində növbə qurmağa icazə verilməyib. Nəticədə çoxsaylı şəhər sakinləri çölə çıxarılaraq açıq havada gözləyiblər.
Qəbul prosesində iştirak edən şəxslərdən birinin iddiasına görə, əvvəlcədən elan olunan 10 vakansiya mövcud olmayıb. Qəbul yalnız bir vakansiya – satıcı işi üzrə aparılıb.
Qeyd edək ki, hadisə ilə bağlı Gəncə-Daşkəsən Regional Məşğulluq filialı ilə əlaqə saxlamaq cəhdlərimiz nəticəsiz qalıb: qurumun telefon xətti zənglərin qəbulu üçün bağlıdır.
