Gəncə şəhərinin müxtəlif ərazilərində məişət tullantılarının vaxtında daşınmaması sakinlərin narazılığına səbəb olur.
Gencexeber.az-a daxil olan şikayətlərə görə, şəhərin Nağıbəy Şeyxzamanov küçəsində Mərkəzi Univermağın yaxınlığında yerləşən zibil qablarının dolub-daşdığı bildirilir. Tullantıların ətrafa yayılması ərazidə xoşagəlməz görüntü yaradır.
Digər problem isə Abbas Səhhət küçəsində, Gəncədə neft bazasına, eləcə də Gəncə Beynəlxalq Hava Limanına aparan yolda müşahidə olunur.
Sakinlərin sözlərinə görə, market sahiblərinə məxsus ferma və obyektlərin ərazisindən çıxan tullantılar mütəmadi olaraq əraziyə atılır. Zibil qablarının vaxtında boşaldılmadığı, yerə tökülən tullantıların isə ümumiyyətlə yığışdırılmadığı iddia edilir.
Nəticədə yeni yaşayış massivində ciddi antisanitar vəziyyət yaranıb. Sakinlər ərazidə təmizlik işlərinin gücləndirilməsini və tullantıların vaxtında daşınmasını istəyirlər.
