Gəncə şəhərində General-mayor Hacıbaba Zeynalov və Adil Babayev küçələrinin kəsişməsində kanalizasiya sisteminin olmaması əhalinin ciddi narazılığına səbəb olub.
Gencexeber.az-a şikayətlərini bildirən sakinlərin sözlərinə görə, ərazidə kanalizasiya şəbəkəsi olmadığından çirkab suları açıq kanallara axıdılır. Nəticədə küçədə çirkab gölməçələri əmələ gəlir, xüsusilə yay aylarında isə yüksək temperatur səbəbindən əraziyə kəskin üfunət yayılır.
Onlar bildirirlər ki, yaranmış vəziyyət həm sanitar-gigiyenik baxımdan təhlükə yaradır, həm də gündəlik yaşayışa ciddi maneə törədir.
Sakinlərin iddiasına görə, problemlə bağlı aidiyyəti qurumlara dəfələrlə müraciət etsələr də, indiyədək kanalizasiya sisteminin qurulması və ya problemin aradan qaldırılması istiqamətində heç bir tədbir görülməyib.
Ərazi sakinləri məsələ ilə bağlı aidiyyəti qurumların operativ tədbir görməsini və kanalizasiya sisteminin çəkilməsini xahiş edirlər.
