Xəbər verdiyimiz kimi, Gəncədə "BakuBus" MMC-yə məxsus 11 nömrəli marşrut xətti ilə hərəkət edən avtobusda sürücü ilə sərnişin arasında insidentdən yaşanıb. Hadisə zamanı sürücü sərnişindən kobud şəkildə avtobusu tərk etməsini tələb edib və onu yumruq zərbələri ilə hədələyib. Azərbaycan Yerüstü Nəqliyyat Agentliyindən (AYNA) verilən məlumata görə, hadisədən sonra sürücünün əmək müqaviləsinə xitam verilib.
Sözügedən insidentin tərəfləri – sürücü Elşən Əliyev və sərnişin Sabir Abbasov Gencexeber.az-a müraciət edərək bir-birindən üzr istədiklərini və barışdıqlarını bildiriblər. Onlar baş verən hadisəyə görə peşman olduqlarını qeyd ediblər.
Sürücü Elşən Əliyev bildirib ki, həmin vaxt səhər saatlarında yollarda müşahidə edilən sıxlıq, avtobusun salonunda yaranan gərginlik və nəqliyyat vasitəsinə zərər dəyə biləcəyi ehtimalı onu həyəcanlandırıb.
"Əlbəttə, belə bir şey olmamalı idi. Sabir kişi ilə də barışmışam, aramızda anlaşılmazlıq olub", – deyə sürücü bildirib.
Sərnişin Sabir Abbasov isə öz növbəsində hadisə zamanı daha anlayışlı davranmalı olduğunu qeyd edib. O, Elşən Əliyevin işdən çıxarılmasının ona pis təsir etdiyini deyib:
"Gərək mən də diqqətli olardım. Hadisədir, oldu, bitdi. Salonun daxilindəki gərgin ab-hava mənim də özümdən çıxmağıma səbəb olub. Əlbəttə, peşmanam. İndi barışmışıq", – deyə sərnişin bildirib.
Sərnişin "BakuBus" MMC-nin fəaliyyətindən razı olduğunu da vurğulayaraq sürücünün yenidən işinə qaytarılmasını xahiş edib:
"İstəyərdim ki, Elşən qardaşımız işinə qayıtsın. İki övlad sahibidir".
