Gəncədə ağır yol-nəqliyyat hadisəsi baş verib.
Gencexeber.az-ın məlumatına görə, hadisə şəhərin Şah İsmayıl Xətai prospektində qeydə alınıb. Hərəkətdə olan "VAZ-2104" markalı minik avtomobili ilə "Chevrolet" markalı maşın toqquşub.
Qəza zamanı "VAZ-2104"ün sürücüsü, 1953-cü il təvəllüdlü Mübariz Məmmədov hadisə yerində həyatını itirib. Həmin avtomobildə olan sərnişin, 2010-cu il təvəllüdlü Müzəffər Qədimov isə xəsarət alıb.
Zərbənin təsirindən "VAZ-2104" markalı avtomobil ciddi deformasiyaya uğrayıb, hətta mühərriki yerindən çıxaraq yolun hərəkət hissəsinə düşüb.
Hadisə yerinə polis əməkdaşları cəlb edilib.
Faktla bağlı araşdırma aparılır.
