Gəncə şəhərinin Bayan küçəsinin sakinləri yaşadıqları ərazidə illərdir həllini gözləyən problemlərdən narazıdırlar.
Gencexeber.az-a müraciət edən vətəndaşların sözlərinə görə, küçədə içməli su, kanalizasiya, yol, küçə işıqlandırılması və məişət tullantılarının daşınması sahəsində ciddi çatışmazlıqlar mövcuddur. Onlar bildirirlər ki, dəfələrlə aidiyyəti qurumlara müraciət etsələr də, problemlərin aradan qaldırılması istiqamətində real addımlar atılmayıb.
Bayan küçəsində təxminən 100-ə yaxın ailənin yaşadığı deyilir. Sakinlər hesab edirlər ki, ərazidəki əsas problemlərin həlli üçün ilk növbədə küçəyə təxminən 3 kilometr uzunluğunda asfalt örtüyünün çəkilməsi vacibdir. Onların fikrincə, yol problemi həll olunduqdan sonra digər kommunal məsələlərin də mərhələli şəkildə aradan qaldırılması mümkün olacaq.
Sakinlər aidiyyəti qurumlardan əraziyə baxış keçirilməsini və mövcud problemlərin həlli istiqamətində tədbirlərin görülməsini xahiş edirlər.
Məsələ ilə bağlı Gəncə şəhər İcra Hakimiyyətindən isə bildirilib ki, Bayan küçəsinə su və kanalizasiya xətti çəkildikdən sonra asfalt örtüyü döşənəcək. Layihə Açıq Kommunal İnfrastruktur Proqramı II çərçivəsində mərhələli şəkildə aparılır.
