Gəncə sakinləri küçədə qalan kişinin durumuna biganə qalmamağı xahiş edirlər.
Gencexeber.az-a müraciət edən vətəndaşların sözlərinə görə, yaşlı kişi bir həftədən çoxdur şəhərin küçələrində gecələyir. Bildirilir ki, həmin şəxs gəncəlilərin verdiyi yemək və su ilə qidalanır.
Məsələ ilə bağlı kişi ilə ünsiyyət quran sakinlərin dediyinə görə, o, qızının və oğlunun ona sahib çıxmadığını bildirib. Yaşlı kişi həmçinin qocalar evinə yerləşdirilməsi üçün yardım istəyir:
"Oğlum və qızım üz döndərib. Mənə sahib çıxan yoxdur. Qocalar evinə getmək istəyirəm".
Sakinlər aidiyyəti qurumlardan məsələyə həssas yanaşılmasını və kişinin təhlükəsiz şəraitə yerləşdirilməsi üçün müvafiq tədbirlərin görülməsini xahiş edirlər.
