Son günlər Gəncə Dövlət Universitetinin (GDU) bağlanacağı barədə məlumatlar yayılıb. İddialara görə, universitet müəyyən yoxlamalardan keçmədiyi üçün fəaliyyətini dayandıracaq. Bu xəbər tələbələr və valideynlər arasında narahatlıq yaradıb.
Maraqlıdır, bu məlumat nə dərəcədə doğrudur? Universitetin bağlanması ilə bağlı hər hansı rəsmi qərar varmı?
Məsələ ilə bağlı publika.аz-a universitetin mətbuat katibi ilə əlaqə saxlamağa çalışsa da, zənglərə cavab verən olmayıb.
Təhsil eksperti Kamran Əsədov isə açıqlamasında bildirib ki, sözügedən universitetin akreditasiyadan keçməsi ilə bağlı müəyyən problemi var:
"Azərbaycanda dövlət universitetinin bağlanması təcrübəsi var. Buna misal olaraq Müəllimlər Universitetini göstərə bilərik. Ancaq GDU tarixi universitetdir, kökü var, yaxşı kadr potensialı mövcuddur. Düzdür, bəzən tələbələr arasında şikayətlər olur".
Ekspert qeyd etdi ki, bölgələrdə universitetlərə ehtiyac var:
"Hazırda Gəncədə üç universitet - Azərbaycan Texnologiya Universiteti (ATU), Azərbaycan Dövlət Aqrar Universiteti (ADAU) və Gəncə Dövlət Universiteti (GDU) fəaliyyət göstərir. Bundan əlavə, iki kollec də mövcuddur. Amma GDU-nun bağlanması müzakirə predmetinə çevrilə bilməz. Çünki kifayət qədər tələbə sayı və kadr potensialı var, köklü universitetdir.
Bildiyimə görə, ADA universiteti də Gəncədə filial açır və gələn il fəaliyyətə başlayacağı gözlənilir. Ola bilər ki, həmin universitet GDU-nun hansısa tədris qolunu və ya korpusunu götürsün. Və yaxud da universitetin hansısa korpusu bağlana bilər. Amma birmənalı şəkildə GDU-nun bağlanması gündəmdə deyil. Əlbəttə, təkmilləşməyə və islahatlara ehtiyac var, amma bağlanmağa yox".
