Şəmkirli qız Bakıda burun əməliyyatı zamanı komaya düşüb.
Gencexeber.az-a bu barədə əslən Şəmkir rayonundan olan zərərçəkmişin bacısı İlhamə Budaqlı məlumat verib.
Onun sözlərinə görə, bacısı Nigar Budaqlı 30 aprel 2025-ci ildə adıçəkilən klinikada burun nahiyəsindən cərrahi plastik əməliyyat olunub:
"Bacımı ilk dəfə ötən ilin avqustun 15-də "MedAura" klinikasında Yaqub Əsədi əməliyyat edib. Təəssüf ki, həmin əməliyyat uğursuz alındı. Daha sonra 2025-ci ilin 30 aprelində, birinci əməliyyatda yaranan səhvləri düzəltmək məqsədi ilə ikinci əməliyyata alındı. Bu əməliyyat da estetik cərrah Yaqub Əsədi və anestezioloq Cəmilə Əliyeva tərəfindən aparıldı. Bu əməliyyat zamanı səhlənkarlıq nəticəsində bacım komaya düşdü və artıq 6 aydır bu vəziyyətdədir. Biz ədalətin bərpa olunmasını, məsul şəxslərin əməllərinin araşdırılmasını və məsələyə ictimai diqqət yetirilməsini xahiş edirik".
Məsələ ilə bağlı estetik cərrah Yaqub Əsədi ilə əlaqə saxladıq. Adıçəkilən həkim ölkə xaricində olduğu üçün zəngimizi oğlu cavablandırdı. İddialarla bağlı həkimin oğlu qeyd etdi ki, əməliyyat zaman anestezioloq səhlənkarlıq edib:
"Atam ölkə xaricindədir. Səsləndirilən iddialarla bağlı onu deyə bilərəm ki, əməliyyat zamanı atam heç bir nöqsan etməyib. Səhlənkarlıq anestezioloq Cəmilə Əliyeva tərəfindən edilib".
Anestezioloq Cəmilə Əliyeva ilə əlaqə saxlamağa çalışsaq da, telefon zənglərimizi cavablamadı. Buna baxmayaraq, qarşı tərəfin də fikirlərini işıqlandırmağa hazırıq.
