Xəbər verdiyimiz kimi, fevralın 27-si Gəncədə əsən güclü külək şəhər ərazisində bir sıra fəsadlara səbəb olub.
Gencexeber.az-ın məlumatına görə, küləyin təsiri nəticəsində şəhərdə fəaliyyət göstərən 46 saylı körpələr evi-uşaq bağçasının dam örtüyü aşıb. Xoşbəxtlikdən hadisə zamanı xəsarət alan olmayıb. Lakin hadisənin baş verdiyi tarixindən bu günədək dağılan konstruksiya hələ də yerdə qalmaqdadır.
Məsələ ilə bağlı Gəncə-Daşkəsən Regional Təhsil İdarəsindən redaksiyamıza bildirilib ki, Gəncə şəhər 46 saylı körpələr evi-uşaq bağçasına dəymiş zərərin miqyası dəyərləndirilib:
"Yaxın günlərdə təhsil müəssisəsində zəruri təmir-bərpa işlərinin həyata keçirilməsi planlaşdırılır və bağçanın infrastrukturunun əvvəlki vəziyyətinə qaytarılması nəzərdə tutulur. Müvafiq qurumlar tərəfindən proses nəzarətdə saxlanılır".
Qeyd edilib ki, hazırda təhsil müəssisəsində təlim-tədris prosesinin fasiləsizliyi təmin edilib. Təhlükəsizliyin təmin edilməsi məqsədilə uşaqların məşğələləri müəssisənin digər korpusunda davam etdirilir.
