Xəbər verdiyimiz kimi, müğənni Rəqsanə İsmayılovanın barəsində seçilmiş ev dustaqlığı qətimkan tədbirinin müddəti daha bir ay uzadılıb. Bu səbəbdən müğənninin Gəncədə planlaşdırılan konsertinə bilet alan və ya tədbirə qatılmağı planlaşdıran şəhər sakinləri və şəhərin qonaqları arasında tədbirin baş tutub-tutmayacağı ilə bağlı suallar yaranıb.
Gencexeber.az xəbər verir ki, eyni zamanda Azərbaycan mediasında Rəqsanə İsmayılovanın ev dustaqlığında olduğu müddətdə konsert təşkil etməsinin və həmin konsertdə iştirakının qanunla qadağan olunduğu ilə bağlı yayılan məlumatlar da bu şübhələri daha da artırıb.
Müğənni səsləndirilən fikirlərə və yayılan xəbərlərə sosial şəbəkə hesabı vasitəsilə münasibət bildirib. O, Gəncədə planlaşdırılan konsertin baş tutacağını açıqlayıb.
Bununla yanaşı, Rəqsanə İsmayılova qeyd edib ki, konsert proqramı yalnız Gəncə ilə məhdudlaşmır. Sənətçinin sözlərinə görə, eyni proqram Sumqayıt, Mingəçevir, Naxçıvan və Bakı şəhərlərində də təqdim olunacaq.
Sözügedən məlumat xeberci.еs media resursu tərəfindən də təsdiqlənib. Bildirilir ki, bəzi media səhifələrində müğənninin ev dustaqlığında olması səbəbilə konsertin qanunsuz keçiriləcəyi barədə iddialar səsləndirilsə də, təşkilatçılar bu məlumatların həqiqəti əks etdirmədiyini bildirirlər.
Qeyd olunub ki, konsertin keçirilməsi üçün müvafiq dövlət qurumlarından rəsmi icazə alınıb. Gəncə Dövlət Filarmoniyası dövlət müəssisəsi olduğundan tədbirin qanunsuz keçirilməsi mümkün deyil və konsert planlaşdırıldığı kimi baş tutacaq.
