Bu gün şəhərimizin adının bərpası günüdür.
Gencexeber.az məlumat verir ki, Gəncənin adının bərpasından 35 il keçir. 4 minillik zəngin tarixə malik şəhərimiz 1804-cü ildən 1918-ci ilədək Yelizavetpol adlandırılıb. 1918-ci ildə adı yenidən bərpa edilsə də, 22 fevral 1935-ci ildə şəhərin adı dəyişdirilərək Kirovabad olub. Nəhayət, 54 il sonra – 30 dekabr 1989-cu ildə Nizami yurdunun adı özünə qaytarılıb.
1989-cu ilin 29 noyabrında Kirovabad Şəhər Xalq Deputatları Sovetinin sessiyasında sözügedən məsələ müzakirə olunub. Bu təklif qəbul edilib və ertəsi gün qərar verilib. 30 dekabrda Azərbaycan SSR Ali Sovetinin Rəyasət Heyəti bu qərarı təsdiq edib. Sənəddə deyilirdi: “Gəncənin tarixi adını bərpa etmək haqqında şəhər vətəndaşlarının, əmək kollektivlərinin və respublikanın geniş ictimaiyyətinin çoxsaylı müraciətini, Kirovabad Şəhər Xalq Deputatları Sovetinin xahişini nəzərə alaraq və Azərbaycan SSR Konstitusiyasının 114-cü maddəsinə (18-ci bənd) uyğun olaraq, “Kirovabad şəhəri Gəncə şəhəri adlandırılsın”.
