Gəncə şəhərinin özünəməxsus şirniyyat növlərindən biri zilviyyədir.
Gencexeber.az məlumat verir ki, zilviyyə qədimdə Gəncədə Novruz bayramı süfrəsinin rəmzlərindən biri hesab edilirdi. Bu şirniyyatı, əsasən, Novruz bayramına bir neçə gün qalmış bişirər və bayram axşamı süfrəyə düzərdilər.
Zilviyyə, adətən, dairəvi formada, sarı və qırmızı rənglərdə hazırlanır. Qırmızı zilviyyə Günəşə, sarı zilviyyə isə Aya bənzədilir. Hər ikisinin dairəvi olması isə gecə ilə gündüzün bərabərliyinin işarəsi kimi sayılır.
Şirniyyatın bişirilməsində buğda unu, yumurta ağı, qatıq, nişasta və mayadan, şərbətinin hazırlanmasında şəkər və sudan, qızardılmasında isə bitki yağından istifadə olunur.
