Gəncədə süni gölün bərpası işləri yubanır.
Gencexeber.az-ın məlumatına görə, artıq bir ildən çoxdur ki, Gəncə şəhər Heydər Əliyev Park-Kompleksində yerləşən süni göldə təmir-bərpa işləri həyata keçirilir. Lakin çalışmalar hələ də başa çatmayıb. Hövzə isə susuz vəziyyətdə qalıb.
Məlumat üçün bildirək ki, Gəncə Şəhər İcra Hakimiyyəti tərəfindən ötən ilin noyabr ayında ictimaiyyətin diqqətinə çatdırılmışdır ki, 6 hektar əraziyə malik süni gölün 2024-cü ilin dekabr ayında təhvil veriləcəyi gözlənilir. Gölə suyun, eləcə də müxtəlif balıq növlərinin buraxılmasına başlanılmalı idi.
Qeyd edək ki, işlər Azərbaycan Dövlət Su Ehtiyatları Agentliyinin tabeliyindəki Regional Su Meliorasiya Xidmətinin sifarişi əsasında aparılır.
Azərbaycan Dövlət Su Ehtiyatları Agentliyinin və Gəncə Şəhər İcra Hakimiyyətinin rəsmilərinin dəfələrlə əraziyə baxış keçirmələrinə baxmayaraq, sözügedən işlərin görülməsini həyata keçirən özəl şirkət vaxtında sifarişi yerinə yetirməyib.
Xatırladaq ki, süni göl 2023-cü ilin yaz aylarında qonşu rayonların ərazisindən gələn sel suları nəticəsində daşaraq, ətrafda yerləşən yaşayış sahələri üçün təhlükə yaradıb. Dibi lil və palçıqla dolan gölün suyu aidiyyəti qurumlar tərəfindən tamamilə çəkilmişdi.
