Xəbər verdiyimiz kimi, Mərkəzi Qan Bankının Anton Çexov küçəsində yerləşən Gəncə bölməsinin binası acınacaqlı vəziyyətdədir.
Talassemiya və digər qan xəstəliklərindən əziyyət çəkən uşaqların müalicə olunduğu bu tibb ocağının tavanları qəzalı haldadır. Yağış yağanda su binanın daxilinə axır.
Məsələ ilə bağlı Gencexeber.az Səhiyyə Nazirliyinə sorğu ünvanlayıb. Qurumdan sorğuya cavab olaraq bildirilib ki, binanın son durumu ilə bağlı nazirlik məlumatlıdır:
“Tikilməkdə olan müəssisələrin müdiriyyətindən verilən məlumata görə, Gəncə Qan Bankının binasının təmir-tikintiyə ehtiyacı olması ilə bağlı Səhiyyə Nazirliyi məlumatlıdır. Gəncə Qan Bankının binasının təmir-tikintisinin Dövlət İnvestisiya Proqramına daxil edilməsi təklifi də müvafiq dövlət qurumuna təqdim edilib.
Maliyyə vəsaiti ayrılacağı təqdirdə 2025-2028-ci illər ərzində binanın əsaslı təmiri və ya yenidən inşası həyata keçiriləcək”.
Qeyd edək ki, 2020-ci ildə Vətən Müharibəsi dövründə cəbhənin ehtiyacları üçün qan ehtiyatı məhz bu mərkəzdə yığılıb. Mərkəzi Qan Bankının Gəncə bölməsi təkcə Gəncə deyil, Azərbaycanın qərb bölgəsinə də xidmət edir.
Əsmər Sənani
