Gəncə Dövlət Universiteti nəzdində fəaliyyət göstərən Regional Kollecin tələbələri uzun müddətdir yeni rəhbərlik tərəfindən qeyri-qanuni məhdudiyyətlər və haqsızlıqlarla üzləşdiklərini iddia edirlər.
Gencexeber.az-a məsələ ilə bağlı tələbələrdən çoxsaylı şikayətlər daxil olub.
Bildirilib ki, direktor vəzifəsini yanvar ayının ortalarından icra edən Xoşqədəm Xudiyeva təhsil ocağının daxili qaydalarını tələbələrin hüquqlarını pozacaq şəkildə dəyişdirib:
“Hazırda kollecin daxilində əvvəllər fəaliyyət göstərən iki bufetdən biri qapadılıb. Bu səbəbdən bufetdə iri növbələr yaranır və tələbələr tənəffüs zamanı yemək yeməyə çatdırmır. Tənəffüs vaxtında binadan çıxmağımıza isə icazə verilmir.
Hətta yaxınlıqda yerləşən mağazalardan yemək almaq da qadağan olunub. Dərs zamanı ayaqyoluna getməyə, telefonla danışmağa, hətta qısa müddətdə dəhlizə çıxmağımıza da icazə verilmir.
Kollecin mühafizəçiləri bildirir ki, bu məhdudiyyətlər Xoşqədəm Xudiyevanın “qəti təlimatıdır”. Bu məhdudiyyətlər qanunidirmi?”.
Şikayətçilər əlavə ediblər ki, onların şəxsi azadlığına da müdaxilə edilir. Kollecin daxili qaydaları adı altında tələbələrin geyim tərzinə, saç düzümünə və makiyajına qarışılır. Heç bir əsas olmadan tələbələrin görünüşü ilə bağlı məhdudiyyətlər qoyulub:
“Tələbələr olaraq Elm və Təhsil Nazirliyindən, Ombudsman Aparatından və digər müvafiq qurumlardan bu məsələyə müdaxilə etmələrini tələb edirik. Təhsil müəssisəsində tələbələrin hüquqlarının kobud şəkildə məhdudlaşdırılması qəbuledilməzdir. Gəncə Dövlət Universitetinin rəhbərliyi və nazirlik bu məsələyə ciddi yanaşmalı, tələbələrin hüquqlarının qorunmasını təmin etməlidir”.
Qeyd edək ki, məsələ ilə bağlı Elm və Ali Təhsil üzrə Dövlət Agentliyinə sorğu ünvanlamışıq.
