Türkiyəli səyyah Gəncədə taksi sürücüsünün qeyri-adekvat münasibəti ilə rastlaşıb.
Gencexeber.az məlumat verir ki, gəzdiyi ölkə və şəhərlərlə bağlı təəssüratlarını “Mert Aktas Travel” “Youtube” kanalında bölüşən, İzmirdən (Türkiyə) olan səyyah Mert Aktaş Nizami yurdunu ziyarət edib. O, Gəncəyə gəldiyi gün şəhərdə taksi fəaliyyəti ilə məşğul olan bir şəxsin xoş olmayan rəftarı ilə qarşılaşıb.
Belə ki, Mert Aktaş tətbiqlərdən birinin vasitəsilə taksi sifariş edib. Bir müddət sonra sürücü onunla əlaqə saxlayaraq səfərin qiymətini soruşub və aldığı cavabda ona açıqlanan məbləğin az olmasından gileylənib.
Qiymətin artırılmasına nail olan həmin şəxs gəlib müştərini götürdükdən sonra səyyahın maşının daxilində çəkiliş aparmasına irad bildirib. Nəticədə mübahisə edən taksi sürücüsü şəhərin qonağını avtomobildən endirib.
